పాము కాటేసినా.. పరీక్షకు హాజరైన విద్యార్థిని

కటక్‌, న్యూస్‌టుడే: పాము కాటేసినా.. వెరవకుండా ఆ బాలిక పరీక్ష రాసింది. ఒడిశాలోని కేంఝర్‌ జిల్లా దధిబబపూర్‌ గ్రామానికి చెందిన విద్యార్థి లిప్సా రాణి సాహు(17) ఆనందపూర్‌ ప్రభుత్వ కళాశాలలో ఇంటర్‌ చదువుతోంది. శనివారం ఫైనల్‌ పరీక్ష రాసేందుకు ఇంటి నుంచి వెళ్తుండగా పాము కాటేసింది. వెంటనే విషయాన్ని కుటుంబ సభ్యులకు తెలిపింది. ఆసుపత్రికి వెళ్దామని తల్లిదండ్రులు చెప్పినా.. పరీక్షలు రాయకపోతే ఏడాది కాలం వృథా అవుతుందని చెప్పి పరీక్షా కేంద్రానికే బయలుదేరింది. తండ్రి ఆమెను ద్విచక్ర వాహనంపై పరీక్షా కేంద్రానికి తీసుకెళ్లాడు. అక్కడ పరీక్ష రాస్తూ అస్వస్థతకు గురికావడంతో సిబ్బంది, తండ్రి కలసి ఆమెను ఆనందపూర్‌ సబ్‌ డివిజనల్‌ ఆసుపత్రికి తరలించారు. ప్రాణాపాయం లేదని వైద్యులు తెలిపారు.