వైద్యరంగంలో కృత్రిమ మేధ వినియోగానికి ఐసీఎంఆర్‌ మార్గదర్శకాలు

దిల్లీ: జీవ వైద్య పరిశోధనలు, ఆరోగ్య రంగంలో కృత్రిమ మేధ (ఏఐ) వినియోగంలో అనుసరించాల్సిన నైతిక సూత్రాలకు సంబంధించి భారత వైద్య పరిశోధనా మండలి (ఐసీఎంఆర్‌) దేశంలో తొలిసారిగా మార్గదర్శకాలను విడుదల చేసింది. వైద్యరంగంలో ఏఐ ప్రధానంగా రోగి నుంచి తీసుకున్న డేటా ఆధారంగా పనిచేస్తుందని, దీంతో ఆశ్రిత పక్షపాతం, డేటా నిర్వహణ, స్వయంప్రతిపత్తి, వృత్తిపరమైన పోటీ, గోప్యత తదితర అంశాల్లో సమస్యలు ఉత్పన్నమయ్యే అవకాశమున్నందున మార్గదర్శకాలు అత్యవసరమని వైద్య పరిశోధన విభాగం, ఐసీఎమ్‌ఆర్‌కు చెందిన కృత్రిమ మేధ విభాగం తమ నివేదికలో వెల్లడించాయి. అయితే ఇవి వైద్య రంగంలో ఏఐ పాత్రను పరిమితం చేయడానికి కాదని, కృత్రిమ మేధను పూర్తిగా సద్వినియోగం చేసుకోవడంతోపాటు సురక్షితమైన విధానాల్లోనే దానిని ఉపయోగించడానికి మాత్రమేనని స్పష్టం చేసింది.