ఫలించిన తేజస్వి కోరిక

ఆడబిడ్డ పుట్టడంతో సంబరాలు

పట్నా: బిహార్‌ ఉప ముఖ్యమంత్రి, ఆర్జేడీ నేత తేజస్వీ యాదవ్‌, రాజశ్రీ దంపతులకు సోమవారం పండంటి బిడ్డ జన్మించింది. ఈ విషయాన్ని తేజస్వి ట్విటర్‌లో పంచుకున్నారు. దీంతోపాటు కుమార్తెను చేతుల్లో పట్టుకుని మురిపెంగా చూస్తున్న ఫొటోను పోస్ట్‌ చేశారు. ఈ శుభవార్తతో తేజస్వి కుటుంబ సభ్యులతోపాటు ఆర్జేడీ కార్యకర్తలు సంబరాలు చేసుకున్నారు. తేజస్వి సోదరుడు తేజ్‌ప్రతాప్‌ అసెంబ్లీ ఆవరణలో మిఠాయిలు పంచారు. ‘‘నేను పెదనాన్నను అయ్యాను. మా ఇంటికి లక్ష్మీదేవి వచ్చింది’’ అని ఆయన ఆనందం వ్యక్తం చేశారు. కొన్ని రోజుల క్రితం అసెంబ్లీలో తేజస్వి మాట్లాడుతూ తనకు తొలి సంతానంగా అమ్మాయి పుట్టాలని కోరుకుంటున్నట్లు తెలిపారు. ఇప్పుడు ఆయన కోరిక ఫలించి ఆడబిడ్డ జన్మించింది.