లోయలోకి దూసుకెళ్లిన శబరిమల యాత్రికుల బస్సు

కేరళలో 62 మందికి తీవ్ర గాయాలు

కేరళలోని పథనంతిట్ట జిల్లాలో ఘోర ప్రమాదం చోటుచేసుకుంది. శబరిమల యాత్రికులు ప్రయాణిస్తున్న ఓ బస్సు లోయలో పడిపోయింది. ఈ దుర్ఘటనలో 62 మంది తీవ్రంగా గాయపడ్డారు. వారిలో డ్రైవర్‌ సహా పలువురి పరిస్థితి విషమంగా ఉన్నట్లు తెలుస్తోంది. ప్రమాద సమయంలో బస్సులో 9 మంది చిన్నారులు సహా మొత్తం 64 మంది ఉన్నారు. వారంతా తమిళనాడులోని మయిలాదుతురయ్‌ జిల్లా వాసులని అధికారులు గుర్తించారు. శబరిమల ఆలయాన్ని దర్శించుకుని తిరిగి స్వస్థలాలకు వెళ్తుండగా వారు ప్రమాదం బారిన పడ్డారు. పథనంతిట్ట జిల్లా నిలక్కల్‌ సమీపంలోని ఇలావుంకల్‌ వద్ద మంగళవారం మధ్యాహ్నం బస్సు బోల్తా పడి లోయలోకి దూసుకెళ్లింది. స్థానికులు, అధికారులు సహాయక చర్యలు చేపట్టి.. క్షతగాత్రులను కొట్టాయం వైద్య కళాశాల ఆసుపత్రి సహా పలు వైద్యశాలలకు తరలించారు. పైంకుని పండగను పురస్కరించుకుని శబరిమల ఆలయాన్ని దేవస్థానం బోర్డు సోమవారం తెరిచిన సంగతి గమనార్హం.