విపక్షాల నిరసనల మధ్య కాంపిటీషన్‌ బిల్లుకు లోక్‌సభ ఆమోదం

దిల్లీ: అదానీపై ఆర్థిక అక్రమాల ఆరోపణలు, రాహుల్‌ గాంధీ అనర్హత వేటు అంశాలు బుధవారం కూడా పార్లమెంటును కుదిపేశాయి. ఉభయసభలూ సజావుగా సాగలేదు. అదానీ సంస్థలపై సంయుక్త పార్లమెంటరీ కమిటీ (జేపీసీ) వేయాలన్న తమ డిమాండును విపక్షాలు పునరుద్ఘాటించాయి. ప్లకార్డులు చేతపట్టి మోదీ-అదానీ భాయి-భాయి అంటూ సభ్యులు నినాదాలు చేశారు. ఈ నిరసనల మధ్యే లోక్‌సభలో కాంపిటీషన్‌ (సవరణ) బిల్లు-2022 ఎలాంటి చర్చ లేకుండా ఆమోదం పొందింది. నిబంధనలు ఉల్లంఘించిన సంస్థలపై ప్రస్తుతం అనుసరిస్తున్న మార్కెట్‌ టర్నోవర్‌ పద్ధతిలో కాకుండా అంతర్జాతీయ టర్నోవర్‌ ఆధారంగా జరిమానా విధించే అధికారం ఈ బిల్లు ద్వారా కాంపిటీషన్‌ కమిషన్‌ ఆఫ్‌ ఇండియా (సీసీఐ)కు లభించనుంది. ఆ తర్వాత అటవీ (సంరక్షణ) సవరణ బిల్లు-2023ను కేంద్ర పర్యావరణశాఖ మంత్రి భూపేందర్‌ యాదవ్‌ ప్రవేశపెట్టారు. తాజా సవరణలతో జాతీయ ప్రాధాన్యత కలిగిన భద్రతా, వ్యూహాత్మక ప్రాజెక్టులను ఈ చట్టం పరిధి నుంచి తప్పించనున్నారు. ప్రతిపక్షాల నిరసనలు కొనసాగడంతో సభాపతి స్థానంలో ఉన్న రమాదేవి సోమవారానికి లోక్‌సభను వాయిదా వేశారు. రాజ్యసభలోనూ ఇదే పరిస్థితి. విపక్షాల నినాదాల మధ్య కాంపిటీషన్‌ (సవరణ) బిల్లు-2022 ఆమోదం పొందినట్లు ఛైర్మన్‌ జగదీప్‌ ధన్‌కఢ్‌ తెలిపారు.