కొత్త పార్లమెంటు భవనంలో ప్రధాని మోదీ

నిర్మాణ పనుల పరిశీలన... కార్మికులతో సంభాషణ

ఈనాడు, దిల్లీ: నిర్మాణంలో ఉన్న నూతన పార్లమెంటు భవనాన్ని ప్రధాన మంత్రి నరేంద్ర మోదీ గురువారం సాయంత్రం పరిశీలించారు. కొత్త భవనంలోని రాజ్యసభ, లోక్‌సభ ఛాంబర్లను సందర్శించి అక్కడ సమకూర్చుతున్న సదుపాయాల గురించి అడిగి తెలుసుకున్నారు. సుమారు గంట సమయాన్ని ఆయన వెచ్చించారు. నిర్మాణ కార్మికులతో మాట్లాడారు. ప్రధాని వెంట లోక్‌సభ స్పీకర్‌ ఓం బిర్లా కూడా ఉన్నారు. వచ్చే వర్షాకాల సమావేశాలు కొత్త పార్లమెంటు భవనంలో జరిగే సూచనలున్నాయి. 2021 సెప్టెంబరులోనూ నరేంద్ర మోదీ కొత్త భవన సముదాయాన్ని పరిశీలించి నిర్మాణ పురోగతిని అడిగి తెలుసుకున్నారు. అప్పుడు కూడా కార్మికులతో మాట్లాడారు. ఈ భవనానికి 2020 డిసెంబరు 10న ప్రధానమంత్రి శంకుస్థాపన చేశారు.