జైలు నుంచి సిద్ధూ విడుదల

ప్రజాస్వామ్యం సంకెళ్లలో ఉందన్న కాంగ్రెస్‌ నేత

పటియాలా: కాంగ్రెస్‌ నేత నవ్‌జ్యోత్‌ సింగ్‌ సిద్ధూ శనివారం పటియాలా కేంద్ర కారాగారం నుంచి విడుదలయ్యారు. 1988 నాటి గుర్‌నామ్‌ సింగ్‌ హత్య కేసులో దోషిగా తేలిన ఆయన గడచిన 10 నెలలుగా జైలు శిక్ష అనుభవించారు. వాస్తవానికి సుప్రీం కోర్టు ఆయనకు ఏడాది కఠిన కారాగార శిక్షను విధించింది. ఆయన సత్ప్రవర్తన కారణంగా మరో రెండు నెలల శిక్షాకాలం మిగిలి ఉండగానే సిద్ధూ జైలు నుంచి విడుదలయ్యారు. కారాగారం నుంచి బయటకు వచ్చిన అనంతరం ఆయన మాట్లాడుతూ దేశంలో ప్రజాస్వామ్యం సంకెళ్లలో బందీగా ఉందని, దర్యాప్తు సంస్థలు బానిసలుగా మారాయని విమర్శించారు.