అతిథి మర్యాదలు చేసే రోబో.. తయారీ ఖర్చు రూ.2 వేలు

పశ్చిమ బెంగాల్‌కు చెందిన దేబాశిష్‌ దత్తా అనే యువకుడు పనికిరాని వస్తువులతో రోబోను రూపొందించాడు. ఇంటికి వచ్చిన అతిథులకు ఆహారం, నీళ్లు అందించడం సహా వివిధ పనులు చేసిపెట్టేలా ఈ మరమనిషిని తీర్చిదిద్దాడు. దీని తయారీకి రూ.2 వేలు ఖర్చు అయిందని తెలిపాడు. అవార్డు ఫంక్షన్లలో దీని చేతుల మీదుగా పురస్కారాలు కూడా ప్రదానం చేయొచ్చని దేబాశిష్‌ చెబుతున్నాడు. పాలిటెక్నిక్‌  రెండో ఏడాది చదువుతున్న దేబాశిష్‌ రెండు నెలలు శ్రమించి ఈ రోబోను తయారుచేశాడు. సీ-ప్రోగ్రామింగ్‌ సహాయంతో కోడింగ్‌ చేశాడు. రోబోకు ‘బిధు శేఖర్‌’ అని పేరు పెట్టాడు. ఈ రోబోకు నాలుగు చక్రాలు అమర్చి.. బ్లూటూత్‌తో అనుసంధానం చేశాడు. రోబోను నియంత్రించడానికి రిమోట్‌ యాప్‌ను రూపొందించాడు. మొబైల్‌ ఫోన్‌లోని ఆ యాప్‌ ద్వారా రోబోను కదిలించవచ్చు.