Cyber Crime: ఫోన్‌లో హిప్నటైజ్‌ చేసి రూ.40వేలు స్వాహా!

పోలీసులకు జర్నలిస్టు ఫిర్యాదు
సైబర్‌ నేరగాళ్ల పనేనన్న నిపుణులు

దిల్లీ: ఫోన్‌లో మాటలతో తనను హిప్నటైజ్‌ చేసిన ఓ వ్యక్తి రూ.40 వేలు కాజేశాడని ఓ ఫ్రీలాన్స్‌ జర్నలిస్టు పోలీసులకు ఫిర్యాదు చేశారు. అయితే అది హిప్నటైజ్‌ కాదని, తరచుగా జరుగుతున్న సైబర్‌ మోసాల తరహా ఘటనేనని పోలీసులు, సాంకేతిక నిపుణులు పేర్కొన్నారు. దిల్లీలో రమేశ్‌ కుమార్‌ రాజా అనే ఫ్రీలాన్స్‌ జర్నలిస్టు తాను హిప్నటైజ్‌కు గురై రూ.40 వేలు పోగొట్టుకున్నానంటూ ఏప్రిల్‌ 25న పోలీసులకు ఫిర్యాదు చేశారు.

‘ఒక వ్యక్తి నాకు ఫోన్‌ చేసి అతడికి నేను బాగా తెలిసినట్లుగా మాట్లాడాడు. తను నా పాత స్నేహితుడినని నమ్మించాడు. అతడి మాటలు విన్నాక నేను తర్కంతో ఆలోచించే శక్తిని కోల్పోయినట్లు అనిపించింది. ఆ తర్వాత కొన్ని రోజులకు నన్ను మాటల్లో ముంచి పేటీఎం ద్వారా నా బ్యాంక్‌ ఖాతా నుంచి రూ.20వేలు చొప్పున రెండు సార్లు డబ్బు కాజేశాడు’’ అని రాజా తన ఫిర్యాదులో పేర్కొన్నారు. అయితే ఫోన్‌లో హిప్నటైజ్‌ చేయడం సాధ్యం కాదని హిప్నాటిజంలో 30 ఏళ్ల అనుభవం ఉన్న ఓ వ్యక్తి తెలిపారు.