యాసిడ్‌ దాడితో అంధత్వం.. పదిలో 95% మార్కులతో విద్యార్థిని సత్తా

లక్ష్యాన్ని చేరుకోవాలనే తపన ఉండాలే కానీ అందుకు అంగవైకల్యం అడ్డు కాదని నిరూపించింది చండీగఢ్‌కు చెందిన 15 ఏళ్ల విద్యార్థిని కాఫీ. యాసిడ్‌ దాడికి గురై చూపు కోల్పోయినా.. చదువుపై మక్కువతో సీబీఎస్‌ఈ 10వ తరగతి పరీక్షల్లో 95.2 శాతం మార్కులు సాధించి స్కూల్‌ టాపర్‌గా నిలిచింది. ‘‘నా కుమార్తెకు 3 ఏళ్లు ఉన్నప్పుడు పక్కింటి వ్యక్తి తనపై యాసిడ్‌ దాడి చేయడంతో చూపు కోల్పోయింది. ఆరేళ్లపాటు ఎన్నో ఆస్పత్రులకు తీసుకెళ్లి చూపించినా ఫలితం దక్కలేదు. తాను ఐఏఎస్‌ కావాలనుకుంటోంది. పిల్లలు తమ లక్ష్యాన్ని చేరుకునేందుకు తల్లిదండ్రులు పూర్తి సహకారం అందించాలి’’ అని సచివాలయంలో ప్యూన్‌గా పనిచేస్తున్న కాఫీ తండ్రి పవన్‌ పేర్కొన్నారు.