New Cities: దేశంలో కొత్తగా 8 నగరాలు.. ఏర్పాటుకు కేంద్రం యోచన

ఇందౌర్‌: దేశంలో కొత్తగా ఎనిమిది నగరాలను ఏర్పాటు చేసేందుకు కేంద్ర ప్రభుత్వం ఆలోచిస్తోందని సీనియర్‌ అధికారి ఒకరు తెలిపారు. పట్టణ కేంద్రాలపై నానాటికీ పెరుగుతున్న జనాభా భారాన్ని తగ్గించేందుకు కొత్త నగరాలను అభివృద్ధి చేసే ప్రణాళిక పరిశీలనలో ఉందని ఆయన చెప్పారు.

మధ్యప్రదేశ్‌ ఇందౌర్‌లో గురువారం ‘అర్బన్‌ 20’ సమావేశం తర్వాత కేంద్ర పట్టణ వ్యవహారాలు, గృహ నిర్మాణ శాఖ జీ20 యూనిట్‌ డైరెక్టర్‌ ఎంబీ సింగ్‌ మీడియాతో మాట్లాడారు. 15వ ఆర్థిక సంఘం తన నివేదికలో కొత్త నగరాలను అభివృద్ధి చేయాలని సిఫార్సు చేసిందని తెలిపారు. ‘‘ఆర్థిక సంఘం సిఫార్సు తర్వాత.. పలు రాష్ట్రాలు 26 కొత్త నగరాల కోసం కేంద్రానికి ప్రతిపాదనలు పంపాయి. ఆ తర్వాత ఎనిమిది కొత్త నగరాల ఏర్పాటు అంశాన్ని అధికారులు పరిశీలిస్తున్నారు’’ అని ఎంబీ సింగ్‌ చెప్పారు.