మిగ్‌-21 యుద్ధ విమానాల తాత్కాలిక నిలిపివేత: ఐఏఎఫ్‌

రాజస్థాన్‌ ప్రమాదమే కారణం

దిల్లీ: భారత వాయుసేన (ఐఏఎఫ్‌) తన అమ్ములపొదిలోని యాభై మిగ్‌-21 యుద్ధ విమానాల సేవలను తాత్కాలికంగా నిలిపివేసింది. రెండు వారాల కిందట రాజస్థాన్‌లోని హనుమాన్‌గఢ్‌ వద్ద ఈ విమానం ఓ ఇంట్లోకి దూసుకుపోవడంతో ముగ్గురు వ్యక్తులు మరణించిన విషయం తెలిసిందే. మే 8న సూరత్‌గఢ్‌లోని వాయుసేన స్థావరం నుంచి సాధారణ శిక్షణ నిమిత్తం విమానం బయలుదేరిన కొద్దిసేపటికే ఈ ప్రమాదం జరిగింది. దీంతో మిగ్‌-21 విమానాలు అన్నింటినీ నిలిపివేసి, అధికారులు సాంకేతిక పరీక్షలు నిర్వహిస్తున్నారు. నిపుణుల బృందం నుంచి ఆమోదం లభించిన తర్వాతే ఈ విమానాలు మళ్లీ ఎగురుతాయని సంబంధిత అధికారులు శనివారం వెల్లడించారు. సోవియట్‌ రూపొందించిన ఈ యుద్ధ విమానాలను 1960ల ప్రారంభంలో ప్రవేశపెట్టగా, ఇప్పటివరకు దాదాపు 400 ప్రమాదాలు జరిగాయి. ఈ ఎయిర్‌క్రాఫ్ట్‌లు సుదీర్ఘకాలం భారత వాయుసేనకు ప్రధాన ఆధారంగా నిలిచాయి. ఐఏఎఫ్‌ తన పోరాట పటిమను పెంచుకోడానికి ఇప్పటిదాకా 870 మిగ్‌-21 ఫైటర్లను కొనుగోలు చేసింది. ప్రస్తుతం భారత వాయుసేన వద్ద ఈ యుద్ధ విమానాలు 50 వరకు ఉండగా.. వీటిని దశలవారీగా మూడేళ్లలో తొలగించాలని గతేడాదే ఓ నిర్ణయానికి వచ్చారు.