ప్రజాస్వామ్య సంప్రదాయాలు.. ఆధునికతల మేళవింపు

పార్లమెంటు కొత్త భవన విశేషం

దిల్లీ: దేశ రాజధానిలో ఆదివారం ఆవిష్కృతమైన పార్లమెంటు కొత్త భవనం దేశ ఘన ప్రజాస్వామ్య సంప్రదాయాలకు ఆధునికతలను అద్దుకుని రాజసంగా అలరారుతోంది. వేదకాలం నుంచి ఈ నాటి వరకూ దేశంలో అమలైన ప్రజాస్వామ్య విధానాలను, అవి పరిఢవిల్లిన విశిష్ఠతలను చాటిచెబుతోంది. పార్లమెంటు భవనంలో ప్రత్యేకంగా నిలిచిన రాజ్యాంగ మందిరంలో ఏర్పాటు చేసిన వరుస చిత్రాలు దీనిని స్పష్టం చేస్తున్నాయి. అలాగే ఈ రాజ్యాంగ మందిరాన్ని హిందూ సంప్రదాయాల్లో ఆరాధించే, స్వచ్ఛ శక్తికి నిదర్శనంగా భావించే శ్రీయంత్రం స్ఫూర్తిగా రూపొందించారు. ఇక్కడే ఆధునికతకు ప్రతిరూపంగా డిజిటల్‌్ రూపంలోకి మార్చిన భారత రాజ్యాంగాన్ని ఉంచారు. ఇంకా భూభ్రమణానికి ప్రతీకగా ఫుకో పెండ్యులమ్‌ను త్రికోణాకారపు హాలు పై భాగంలో అమర్చారు. పార్లమెంటు వ్యవహారాలను ప్రభావశీలంగా నిర్వహించేందుకు లోక్‌సభ, రాజ్యసభల్లో సుస్పష్టమైన ధ్వని-దృశ్య, ఆధునిక ఓటింగ్‌ వ్యవస్థలను ఏర్పాటు చేశారు. భవనంలో ప్రత్యేకంగా ఏర్పాటు చేసిన ఉత్సవ వేదికలపై మహాత్మాగాంధీ, చాణక్య, గార్గి, సర్దార్‌ వల్లభ్‌భాయ్‌ పటేల్‌, బి.ఆర్‌.అంబేడ్కర్‌, కోణార్క్‌ సూర్యదేవాలయ రథ చక్రం ఇత్తడి చిత్రాలను అలంకరించారు. సంగీత, స్తపత్య, నిర్మాణ, శిల్ప గ్యాలరీలు ఆయా శాస్త్రాలను ప్రతిబింబిస్తున్నాయి. కొత్త భవనంలో పెయింటింగ్స్‌, రాతి విగ్రహాలు, కుడ్య చిత్రాలు, లోహ ప్రతిమలు మొదలైన 5,000 ఆర్ట్‌వర్క్స్‌ను అమర్చారు. దేశంలోని ప్రఖ్యాత కళాకారులైన ఉస్తాద్‌ అంజాద్‌ అలీ ఖాన్‌, పండిత్‌ హరిప్రసాద్‌ చౌరాసియా, ఉస్తాద్‌ బిస్మిల్లాఖాన్‌, పండిత్‌ రవిశంకర్‌.. వారి కుటుంబ సభ్యులు వారి సంగీత వాద్యాలను సంగీత గ్యాలరీ కోసం వితరణ చేశారని అధికారులు వెల్లడించారు.