ఎయిరిండియా సిబ్బందిపై చేయిచేసుకున్న ప్రయాణికుడు

దిల్లీ: సిబ్బందిపై దురుసుగా ప్రవర్తించడంతోపాటు వారిలో ఒకరిపై చేయిచేసుకున్న ప్రయాణికుడిని ఎయిరిండియా ప్రతినిధులు దిల్లీ విమానాశ్రయంలో భద్రత సిబ్బందికి అప్పగించారు. గోవా నుంచి దిల్లీ వస్తున్న విమానంలో సోమవారం చోటు చేసుకున్న ఘటనపై విచారణ కూడా మొదలైంది. ‘విమానంలో ఓ ప్రయాణికుడు తొలుత సిబ్బందిని దూషించాడు. తర్వాత భౌతిక దాడికి పాల్పడ్డాడు. విమానం దిల్లీకి చేరుకున్న తర్వాత కూడా దుందుడుకు చర్యని ఆపలేదు’ అని ఎయిరిండియా ప్రతినిధి ఒకరు తెలిపారు. సిబ్బంది, ప్రయాణికుల భద్రత తమకు అత్యంత ప్రాధాన్యమని చెప్పారు. విమానంలో దౌర్జన్యానికి పాల్పడేవారిని ఎట్టిపరిస్థితుల్లో ఉపేక్షించేది లేదని ఎయిరిండియా సీఈవో, ఎండీ కాంప్‌బెల్‌ విల్సన్‌ స్పష్టంచేశారు.