నిరుద్యోగం, అవినీతికి వ్యతిరేకంగా 1,300 కి.మీ.ల పాదయాత్ర

నాయకులు తమ పార్టీలను అధికారంలోకి తీసుకురావడం లక్ష్యంగా పాదయాత్రలు చేస్తున్న ఈ రోజుల్లో.. దేశంలో నిరుద్యోగం రూపుమాపి, అవినీతిని అరికట్టాలని కోరుతూ ఓ యువకుడు పాదయాత్రకు పూనుకున్నాడు. భుజాలపై జాతీయ పతాకాన్ని మోస్తూ ఏకంగా 1,300 కిలోమీటర్లు నడిచాడు. రెండు నెలల క్రితం ఉత్తర్‌ప్రదేశ్‌లోని తన స్వగ్రామం కరి నుంచి బయల్దేరిన సుదేశ్‌ జాతీయ రహదారి మీదుగా దిల్లీ రాష్ట్రపతి భవన్‌కు చేరుకొన్నాడు. ఆ తర్వాత పశ్చిమబెంగాల్‌ దిశగా నడుస్తూ గురువారం ఆసన్‌సోల్‌ పట్టణానికి వచ్చాడు. ఇంకా దక్షిణేశ్వర్‌ వరకు నడిచి (మరో 200 కి.మీ.) అక్కడ కాళీమాత ఆలయాన్ని సందర్శిస్తానని సుదేశ్‌ చెబుతున్నాడు. ‘‘నేను ఓ కార్మికుణ్ని. దేశంలో ఎటుచూసినా అవినీతి పేరుకుపోయింది. ఉద్యోగాల్లేక తప్పుదారి పడుతున్న యువతను చూసి చాలాసార్లు బాధపడ్డా. నా వంతు బాధ్యతగా సమాజాన్ని మేల్కొల్పాలని ఈ పాదయాత్ర చేస్తున్నా’’ అని సుదేశ్‌కుమార్‌ తెలిపారు.