బ్యాగులో బాంబు ఉందనడంతో ముంబయి ఎయిర్‌పోర్టులో కలకలం

ముంబయి అంతర్జాతీయ విమానాశ్రయంలో ఓ ప్రయాణికురాలు చేసిన హడావుడి కలకలం రేపింది. పరిమితికి మించి లగేజీ తీసుకొచ్చిన ఆమె.. దానికయ్యే అదనపు ఛార్జీలను చెల్లించేందుకు నిరాకరిస్తూ, తన బ్యాగులో బాంబు ఉందని చెప్పడం భద్రతా సిబ్బందిని ఉరుకులు పరుగులు పెట్టించింది. దక్షిణ ముంబయికి చెందిన ఆ మహిళ తన కుటుంబంతో కలిసి కోల్‌కతా వెళ్లేందుకు ముంబయి విమానాశ్రయానికి చేరుకున్నారు. చెక్‌ఇన్‌ కౌంటరు వద్ద లగేజీ అప్పగించారు. అదనపు బరువు ఉన్నందున నిబంధనల ప్రకారం ఆ మేర అదనంగా డబ్బు చెల్లించాలని సిబ్బంది కోరగా.. ఆమె నిరాకరించారు. ఎయిర్‌లైన్స్‌ సిబ్బందితో వాగ్వాదానికి దిగారు. ఈ క్రమంలో తన లగేజిలోని ఓ బ్యాగులో బాంబు ఉందని ఆమె చెప్పడంతో ఒక్కసారిగా కలకలం రేగింది. అప్రమత్తమైన సీఐఎస్‌ఎఫ్‌ సిబ్బంది ఆమె బ్యాగును క్షుణ్నంగా తనిఖీ చేయగా.. అలాంటిదేమీ లేదని తేలింది. ఈ వ్యవహారం విమానాశ్రయంలో కాసేపు భయాందోళనలకు దారితీసింది. ఇతరుల ప్రాణాలకు, భద్రతకు ముప్పు వాటిల్లేలా ప్రవర్తించారన్న అభియోగాలపై.. ఆమెను అరెస్టు చేసి, కోర్టులో హాజరుపరిచారు.