భూమి నుంచి వింత శబ్దాలు.. వణుకుతున్న కేరళ గ్రామీణులు

కేరళలోని కొట్టాయం జిల్లా చెనప్పాడి అనే కుగ్రామంలో భూమి నుంచి భారీగా వింత శబ్దాలు వస్తుండటంతో స్థానికులు భయభ్రాంతులకు గురవుతున్నారు. శుక్రవారం తెల్లవారుజామున రెండుసార్లు చెవులు చిల్లులు పడేలా భారీ శబ్దాలు వినిపించినట్లు కొందరు తెలిపారు. ఈ వారం ఆరంభంలో చెనప్పాడితోపాటు చుట్టుపక్కల మరికొన్ని ప్రాంతాల్లోనూ ఇలాంటి ధ్వనులే వినిపించాయన్నారు. వాతావరణంలో ఎలాంటి మార్పులు చోటుచేసుకోకున్నా.. శబ్దాలు వినిపిస్తుండటంతో గ్రామస్థులు తీవ్రంగా ఆందోళన చెందుతున్నారు. కేరళ గనులు, భూగర్భశాఖ అధికారులు దీనిపై స్పందిస్తూ త్వరలో నిపుణుల బృందం ఆ ప్రాంతంలో పర్యటించి పరిశోధనలు చేస్తుందని తెలిపారు. అధ్యయనం పూర్తయిన తర్వాతే ధ్వనులపై ఓ స్పష్టత వస్తుందన్నారు. గతంలో మహారాష్ట్రలోని లాతూర్‌ జిల్లా పరిధిలో గల కొన్ని గ్రామాల్లోనూ భూగర్భం నుంచి ఇలాంటి వింత శబ్దాలు వినిపించాయి. వాటిపై నిపుణులు అధ్యయనం చేసినప్పటికీ.. వివరాలు వెల్లడి కాలేదు.