మహాకాళేశ్వర్‌ ఆలయంలో ప్రచండ పూజలు

ఉజ్జయిని: భారత పర్యటనలో ఉన్న నేపాల్‌ ప్రధానమంత్రి పుష్పకమల్‌ దహల్‌ ‘ప్రచండ’ శుక్రవారం మధ్యప్రదేశ్‌ రాష్ట్రం ఉజ్జయిని నగరంలోని జ్యోతిర్లింగ క్షేత్రమైన మహాకాళేశ్వర్‌ ఆలయాన్ని సందర్శించారు. మధ్యప్రదేశ్‌ గవర్నర్‌ మంగూభాయ్‌ పటేల్‌, రాష్ట్ర మంత్రులు మోహన్‌ యాదవ్‌, జగ్దీశ్‌ దేవ్‌దాలు ఆలయం వద్ద నేపాల్‌ ప్రధానికి స్వాగతం పలికారు.  మధ్యాహ్నం 1.30 గంటల సమయంలో ప్రధాన ఆలయంలో ప్రచండ ప్రత్యేక పూజల్లో పాల్గొన్నారు. ఈ సందర్భంగా ఆయన పరమశివుడికి 100 రుద్రాక్షలు, రూ.51,000 సమర్పించుకున్నారు. పూజల అనంతరం తిరిగి ఇందౌర్‌ వెళ్లారు. ఆ నగరంలో నిర్మించిన ఆసియాలోనే అతిపెద్దదైన బయో సీఎన్‌జీ కేంద్రం ‘గోబర్‌-ధన్‌’ని ప్రచండ సందర్శించారు. ఇందౌర్‌ తరహా స్వచ్ఛ కార్యక్రమాలను తమ దేశంలో అమలు చేసే అంశంపై చర్చలు జరిపారు. అనంతరం తన గౌరవార్థం ముఖ్యమంత్రి శివరాజ్‌సింగ్‌ చౌహాన్‌ ఏర్పాటుచేసిన విందులో పాల్గొన్నారు.