గువాహటిలో అత్యవసరంగా దిగిన ఇండిగో విమానం

ప్రయాణికుల్లో కేంద్ర మంత్రి రామేశ్వర్‌ తెలీ
అస్సాంకు చెందిన ఇద్దరు భాజపా ఎమ్మెల్యేలు కూడా

దిబ్రూగఢ్‌: అస్సాంలోని గువాహటి నుంచి దిబ్రూగఢ్‌ బయలుదేరిన ఇండిగో విమానం ఒకటి ఇంజిన్లో సమస్య తలెత్తడంతో తిరిగి గువాహటి విమానాశ్రయంలో అత్యవసరంగా దిగింది. ఈ విమానంలో కేంద్ర పెట్రోలియం శాఖ సహాయమంత్రి రామేశ్వర్‌ తెలీ, అస్సాం రాష్ట్రానికి చెందిన ఇద్దరు భాజపా శాసనసభ్యులు ప్రశాంత ఫుకన్‌, తేరస్‌ గోవలాలు సహా 150 మంది ప్రయాణికులు ఉన్నారు. దిబ్రూగఢ్‌లో దిగడానికి సుమారు 20 నిమిషాల ముందు విమానాన్ని వెనక్కి మళ్లిస్తున్నట్లు ప్రకటించారని కేంద్రమంత్రి పీటీఐ వార్తా సంస్థకు తెలిపారు. ‘‘భాజపా ఎమ్మెల్యేలు ప్రశాంత, తెరస్‌ గొవలాలతో కలిసి నేను విమానంలో బయల్దేరాను. మా విమానం 15-20 నిమిషాల్లో దిబ్రూగఢ్‌లో దిగాల్సి ఉంది. కానీ, సాంకేతిక సమస్య తలెత్తడంతో తిరిగి గువాహటిలో అత్యవసరంగా ల్యాండ్‌ అయింది. మేము సురక్షితంగా ఉన్నాం. మా విమానం నేడు మరోసారి గాల్లోకి ఎగరదని విమానాశ్రయ అధికారులు చెప్పారు’’ అని రామేశ్వర్‌ వెల్లడించారు. తాను అభ్యర్థించినప్పటికీ.. ఇండిగో సిబ్బంది ప్రత్యామ్నాయ ఏర్పాట్లు చేయలేదని, ఈ విషయమై పౌరవిమానయాన శాఖ మంత్రి ఫిర్యాదు చేస్తానని ఆయన స్పష్టంచేశారు.