సత్తా చాటిన స్వదేశీ టోర్పిడో

దిల్లీ: భారత నౌకాదళ అమ్ములపొదిలోకి మరో కొత్త అస్త్రం చేరబోతోంది. స్వదేశీ సాంకేతికతతో అభివృద్ధి చేసిన భారీ టోర్పిడోను నేవీ మంగళవారం పరీక్షించింది. నీటిలోపల ఉన్న లక్ష్యాన్ని ఇది విజయవంతంగా ఛేదించింది. ఇందుకు సంబంధించిన వీడియోను నేవీ ట్విటర్‌లో పోస్ట్‌ చేసింది.  ‘‘నీటి అడుగున ఉండే లక్ష్యాలను కచ్చితంగా ఛేదించగల ఆయుధాల కోసం నేవీ, డీఆర్‌డీవో సాగిస్తున్న అన్వేషణలో ఇదో కీలక మైలురాయి. స్వదేశీ సాంకేతికతతో రూపొందించిన హెవీ వెయిట్‌ టోర్పిడోతో నీటిలోని లక్ష్యాన్ని ధ్వంసం చేశాం. మా పోరాట సంసిద్ధతకు ఇది నిదర్శనం’’ అని నౌకాదళం పేర్కొంది. అయితే ఈ టోర్పిడో పేరును గానీ, దాని సామర్థ్యం గురించి గానీ వెల్లడించలేదు. హిందూ మహాసముద్రంలో చైనా కారణంగా ముప్పు పెరుగుతున్న వేళ.. నేవీ ఈ ప్రయోగం చేపట్టడం ప్రాధాన్యత సంతరించుకుంది.భారత నౌకాదళం వద్ద ఇప్పటికే వరుణాస్త్ర అనే భారీ టోర్పిడో ఉంది. 30 కిలోమీటర్ల దూరంలోని లక్ష్యాలను ఛేదించేందుకు జలాంతర్గామి నుంచి దీన్ని ప్రయోగిస్తారు. ఈ అస్త్రాన్ని విశాఖపట్నంలోని నేవల్‌ సైన్స్‌ అండ్‌ టెక్నలాజికల్‌ ల్యాబొరేటరీ (ఎన్‌ఎస్‌టీఎల్‌) అభివృద్ధి చేసింది.