పెళ్లిలో రక్తదానం.. అవయవదాన ప్రమాణం

ఛత్తీస్‌గఢ్‌లోని చారిత్రక గ్రామం కండెల్‌లో ఆదర్శ వివాహం జరిగింది. ఈ పెళ్లిలో వధూవరులతోపాటు వచ్చిన బంధుమిత్రులు అందరూ రక్తదానం, అవయవదానం చేస్తామంటూ ప్రమాణం చేయటం విశేషం. మహాత్మాగాంధీ సత్యాగ్రహం చేసిన నేల ఇది. గురువారం ఇక్కడ జరిగిన వివాహంలో వధూవరుల బంధువులు 20 మంది రక్తదానం చేశారు. ఈ స్ఫూర్తితో పలువురు ముందుకువచ్చి నేత్రదానం చేస్తామని ప్రకటించారు. ఏడుగురు వ్యక్తులు అవయవ దానానికి తమ అంగీకారం తెలిపారు. ఈ సందర్భంగా వరుడు ముకేశ్‌ సాహు మాట్లాడుతూ.. ‘‘అవసరంలో ఉన్న ఇతర వ్యక్తుల జీవితాలను కాపాడేందుకు రక్తదానం, అవయవదానం చేసేలా ప్రజలు ముందుకురావాలన్న స్ఫూర్తిని చాటడమే మా ఉద్దేశం’’ అన్నారు. పెళ్లి శుభలేఖలో సైతం తాము ఈ విషయాన్ని ప్రచురించినట్లు తెలిపారు.