25 నుంచి రుతుపవనాల తిరోగమనం: ఐఎండీ

దిల్లీ: నైరుతి రుతుపవనాల తిరోగమనం ఈ నెల 25 నుంచి వాయవ్య దిశగా మొదలు కావొచ్చని భారత వాతావరణ విభాగం (ఐఎండీ) శుక్రవారం వెల్లడించింది. సాధారణంగా జూన్‌ 1న కేరళలో ప్రవేశించే ఈ రుతుపవనాలు జులై 18 నాటికి దేశవ్యాప్తంగా విస్తరించి వర్షపాతాన్ని కలగజేస్తాయి. అవి సెప్టెంబరు 17 నుంచి మొదలై అక్టోబరు 15 నాటికి పూర్తిగా వాయవ్య దిశ నుంచి నిష్క్రమిస్తాయి. ప్రస్తుతం అందుకు అనుకూలమైన పరిస్థితులు నెలకొని ఉన్నందున ఈ నెల 25 నుంచి పశ్చిమ రాజస్థాన్‌ ప్రాంతాల నుంచి రుతుపవనాలు నిష్క్రమించే అవకాశం ఉందని ఐఎండీ వివరించింది. నైరుతి రుతుపవనాలు ఆలస్యంగా నిష్క్రమిస్తుండటం వరుసగా ఇది 13వ సారి. ఇలా జరిగితే దేశంలో వర్షాకాలం దీర్ఘకాలం కొనసాగినట్లు భావిస్తారు. ఈ ఏడాది నైరుతి కాలంలో ఇప్పటి వరకూ దేశంలో 780.3 మి.మీ. వర్షపాతం నమోదైంది. సాధారణ వర్షపాతం 832.4 మి.మీ కావడం గమనార్హం.