జమిలి ఎన్నికల కమిటీ తొలి భేటీ నేడు

దిల్లీ: మాజీ రాష్ట్రపతి రామ్‌నాథ్‌ కోవింద్‌ నేతృత్వంలోని జమిలి ఎన్నికల ఉన్నత స్థాయి కమిటీ తొలి సమావేశం శనివారం దిల్లీలో జరగనుంది. లోక్‌సభ, అన్ని రాష్ట్రాల అసెంబ్లీలు, మున్సిపాలిటీలు, పంచాయతీలకు ఒకేసారి ఎన్నికలు జరిపే విషయమై సంబంధిత పక్షాలన్నిటితో సంప్రదింపుల నిర్వహణకు అవసరమైన మార్గసూచీని రూపొందించుకోవడంపై కమిటీ చర్చించనుంది. కేంద్ర ప్రభుత్వం ఈ నెల 2న ఎనిమిది మంది సభ్యులతో ఈ ఉన్నత స్థాయి కమిటీని ఏర్పాటు చేసిన విషయం తెలిసిందే. అయితే, లోక్‌సభలో కాంగ్రెస్‌ పక్ష నేత అధీర్‌ రంజన్‌ చౌధరి ఈ కమిటీలో సభ్యుడిగా ఉండేందుకు నిరాకరిస్తూ కేంద్ర హోంమంత్రికి లేఖ రాశారు. మాజీ రాష్ట్రపతి రామ్‌నాథ్‌ కోవింద్‌తో పాటు కేంద్ర హోం మంత్రి అమిత్‌ షా, రాజ్యసభలో మాజీ విపక్ష నేత గులాంనబీ ఆజాద్‌, ఫైనాన్స్‌ కమిషన్‌ మాజీ ఛైర్మన్‌ ఎన్‌.కె.సింగ్‌, లోక్‌సభ మాజీ సెక్రటరీ జనరల్‌ సుభాష్‌ సి.కశ్యప్‌, సీనియర్‌ న్యాయవాది హరీశ్‌ సాల్వే, మాజీ సీవీసీ సంజయ్‌ కొఠారి ప్రస్తుతం కమిటీలో ఉన్నారు.