పసిప్రాణాన్ని కాపాడిన వృద్ధులు

ఉత్తర్‌ప్రదేశ్‌ రాష్ట్రం వారణాసిలోని చేత్‌గంజ్‌ పోలీస్‌స్టేషను పరిధిలో ముగ్గురు వృద్ధుల చొరవ ఓ చిన్నారి ప్రాణాన్ని కాపాడింది. మంగళవారం ఆ వీధిలో భారీవర్షం కురిసింది. కాస్త తెరిపి ఇవ్వగానే స్థానికుడైన జితేంద్ర కుమారుడు కార్తీక్‌ (10) ఆడుకోడానికి బయటకు వచ్చాడు. అస్తవ్యస్తంగా ఉన్న విద్యుత్తుతీగలు రహదారిపై స్తంభానికి సమీపంగా నిలిచిన వర్షపునీటిలో పడ్డాయి. ఆ మడుగులో అడుగుపెట్టిన కార్తీక్‌ షాక్‌కు గురై అక్కడే పడిపోయి విలవిలలాడాడు. ఆ సమయంలో అటుగా వస్తున్న ముగ్గురు వృద్ధులు బాలుణ్ని గమనించారు. అందులో ఒకరు పరుగున వెళ్లి చిన్నారిని పైకి లేపేందుకు ప్రయత్నించారు. విద్యుత్తు ప్రసరిస్తున్నట్లు గ్రహించాక వెనక్కి తగ్గారు. మిగతా ఇద్దరు వృద్ధులు ఓ కర్రను తీసుకొచ్చి.. దాన్ని నెమ్మదిగా బాలుడి చేతికి అందించారు. చిన్నారి కర్రను పట్టుకోగానే అతణ్ని బురద నీటిలో నుంచి పక్కకు లాగారు. సీసీటీవీలో రికార్డయిన ఈ ఘటన వైరల్‌గా మారింది.