విమానం తలుపు తెరిచేందుకు ప్రయత్నం

బెంగళూరులో ప్రయాణికుడి అరెస్టు

బెంగళూరు(గ్రామీణం), న్యూస్‌టుడే: నాగపూర్‌ నుంచి బెంగళూరుకు వచ్చే విమానంలో అత్యవసర ద్వారాన్ని బలవంతంగా తెరిచేందుకు ప్రయత్నించిన స్వప్నిల్‌ హోలే అనే ప్రయాణికుడిని కెంపేగౌడ అంతర్జాతీయ విమానాశ్రయం పోలీసులు అరెస్టు చేశారు. నాగపూర్‌లో శనివారం రాత్రి 10 గంటలకు ఇండిగో విమానం టేకాఫ్‌కు సిద్ధమవుతున్న సమయంలో స్వప్నిల్‌ విమానం తలుపును తెరిచేందుకు యత్నించాడని సోమవారం పోలీసులు తెలిపారు. విమానయాన సంస్థ సిబ్బంది, ప్రయాణికులు అతని ప్రయత్నాన్ని అడ్డుకున్నారు. బెంగళూరుకు ఆ రోజు రాత్రి విమానం చేరుకున్న తర్వాత అతడిని పోలీసులకు అప్పగించారు. అతని వివరణ తీసుకున్న తర్వాత స్టేషన్‌ బెయిలుపై పోలీసులు విడిచి పెట్టారు.