17న పీఎస్‌ఎల్‌వీ ప్రయోగం

శ్రీహరికోట, న్యూస్‌టుడే: వాతావరణ పరిస్థితులన్నీ అనుకూలిస్తే.. భారత అంతరిక్ష ప్రయోగ కేంద్రమైన శ్రీహరికోట నుంచి ఈ నెల 17న పోలార్‌ శాటిలైట్‌ లాంచ్‌ వెహికల్‌-సి50 (పీఎస్‌ఎల్‌వీ) ప్రయోగాన్ని చేయాలని శాస్త్రవేత్తలు లక్ష్యంగా పెట్టుకున్నారు. వరుస తుపాన్ల నేపథ్యంలో ప్రయోగాన్ని వాయిదా వేస్తూ వస్తున్నారు. తొలుత ఈ నెల 2న పీఎస్‌ఎల్‌వీ-సి50 వాహక నౌకను అనుసంధాన భవనం నుంచి రెండో ప్రయోగ వేదికకు తీసుకొచ్చి, 7న ప్రయోగం చేయాలని శాస్త్రవేత్తలు నిర్ణయించారు. ఈ నెలలో 8వ తేదీ వరకు వరుస తుపాన్లు ఉండటంతో ప్రయోగాన్ని వాయిదా వేశారు. తర్వాత ఈ నెల 14న ప్రయోగం చేయాలని భావించారు. ఐదు రోజులపాటు వాహకనౌకను ప్రయోగవేదికపై ఉంచి వివిధ పనులు చేయాలి. ఈ సమయంలో తుపాన్లు, వర్షాలు పడే అవకాశం ఉండటంతో 14న ప్రయోగం చేయడం వీలుపడదని భావించి 17వ తేదీకి వాయిదా వేశారు. దీనిద్వారా మనదేశానికి చెందిన సీఎంఎస్‌-01 ఉపగ్రహాన్ని నిర్ణీత కక్ష్యలో ప్రవేశ పెట్టనున్నారు.