Oxygen: ప్రాణవాయువు డిమాండ్‌ తగ్గుముఖం

ఈనాడు, దిల్లీ: దేశంలో కరోనా కేసులు తగ్గుముఖం పడుతుండటంతో క్రమేపీ ఆక్సిజన్‌ డిమాండ్‌ తగ్గుతూ వస్తోంది. మే 9న 8,944 మెట్రిక్‌ టన్నుల మేర ఉన్న ఆక్సిజన్‌ సరఫరా తాజాగా 8,344 మె.టన్నులకు చేరినట్లు తెలుస్తోంది. అయినప్పటికీ ఇది తొలి ఉద్ధృతిలో సెప్టెంబరు 29న ఉపయోగించిన గరిష్ఠ పరిమాణం (3,095 మె.టన్నులు) కంటే 170% ఎక్కువే. మే 1న 7,603 మె.టన్నుల మేర ఉన్న సరఫరా ఆ తర్వాత వారం రోజులకు 8,920; మరో 3 రోజులకు 8,944 మె.టన్నులకు చేరింది. ఇంతవరకు ఒక్క రోజులో సరఫరా చేసిన గరిష్ఠ పరిమాణం ఇదే. ఆ తర్వాత నుంచి క్రమంగా తగ్గుతూ వస్తోంది. ఈ ఏడాది మార్చి 31న కేవలం 1,559 మె.టన్నుల మేర మాత్రమే ఉన్న ద్రవీకృత ఆక్సిజన్‌ విక్రయాలు ఒక్క వారంలోనే విపరీతంగా పెరిగాయి. అయితే ఇప్పటికీ ఆసుపత్రులకు 8 వేల మె.టన్నుల వరకు రోజువారీ అవసరమవుతోంది. తాజా లెక్కల ప్రకారం దాదాపు 50 వేల మంది కొవిడ్‌ బాధితులు ఐసీయూల్లోను, 14,500 మంది వెంటిలేటర్ల మీద, 1.37 లక్షల మంది ఆక్సిజన్‌తో చికిత్స పొందుతున్నారు. తొలి ఉద్ధృతి గరిష్ఠస్థాయికి చేరిన సమయంలో ఐసీయూలో 23 వేల మంది, వెంటిలేటర్ల మీద 4 వేల మంది, ఆక్సిజన్‌తో 40 వేల మంది మాత్రమే ఉన్నారు. ఇప్పుడు ఆ సంఖ్య దాదాపు 2-3రెట్లు ఎక్కువగా ఉంది. దానివల్లే ఇప్పటికీ రోజూ 8 వేల మె.టన్నుల వరకు ఆక్సిజన్‌ అవసరం అవుతున్నట్లు తెలుస్తోంది.