Gambhir.. మీరు సమాజానికి అపకారం చేస్తున్నారు

దిల్లీ హైకోర్టు తీవ్ర వ్యాఖ్యలు

దిల్లీ: భారత మాజీ క్రికెటర్‌, భాజపా పార్లమెంట్‌ సభ్యుడు గౌతమ్‌ గంభీర్‌పై దిల్లీ హైకోర్టు తీవ్ర వ్యాఖ్యలు చేసింది. సమాజానికి గంభీర్‌ అపకారం చేస్తున్నారని న్యాయస్థానం ఆగ్రహం వ్యక్తం చేసింది. భారీ మొత్తంలో ఔషధాలను కొనుగోలు చేసి, వాటిని నిల్వ చేసి, ఇతరులకు ఉచితంగా పంచడాన్ని న్యాయస్థానం తప్పు పట్టింది. గంభీర్‌ ఉద్దేశం మంచిదే అయినా దాని వల్ల సమాజానికి నష్టం కలుగుతోందని, మార్కెట్‌లో ఔషధాల కొరత ఏర్పడుతోందని పేర్కొంది. సామాన్యులు ఇబ్బందులు పాలవుతున్నారని ఆవేదన వ్యక్తంచేసింది. 2,345 స్ట్రిప్పుల ఫాబీ ఫ్లూ మాత్రలను గంభీర్‌ కొనుగోలు చేయడంపై కోర్టు తీవ్ర ఆగ్రహం వ్యక్తం చేసింది. బయట మార్కెట్‌లో తీవ్ర కొరత ఉన్న ఒక ఔషధాన్ని అంత భారీ సంఖ్యలో గంభీర్‌ ఎలా కొనుగోలు చేశారో విచారణ జరపాలని దిల్లీ ఔషధ నియంత్రణ అధికారిని ఆదేశించింది.