లైసెన్సు జారీ వేళ డ్రైవింగ్‌ పరీక్ష ఉండదు

అక్రిడేటెడ్‌ డ్రైవింగ్‌ శిక్షణ కేంద్రాలకు కొత్త నిబంధనలు
జులై 1 నుంచి అమల్లోకి

ఈనాడు, దిల్లీ: అక్రిడేటెడ్‌ డ్రైవింగ్‌ శిక్షణ కేంద్రాలకు కొన్ని తప్పనిసరి నిబంధనలను విధిస్తూ కేంద్ర రహదారి, రవాణాశాఖ ఉత్తర్వులు జారీచేసింది. ఈ కొత్త నిబంధనలు జులై 1 నుంచి అమల్లోకి రానున్నాయి. వీటి ప్రకారం అభ్యర్థులకు అత్యుత్తమ శిక్షణ ఇవ్వడానికి ప్రతి డ్రైవింగ్‌ శిక్షణ కేంద్రంలో సిమ్యులేటర్‌, ప్రత్యేక డ్రైవింగ్‌ టెస్ట్‌ ట్రాక్‌ ఉండాలి. మోటారు వాహనాల చట్టం 1988లోని నిబంధనలను అనుసరించి ఈ కేంద్రాల్లో రెమిడియల్‌, రిఫ్రెషర్‌ కోర్సులు అందుబాటులో ఉండాలి. ఈ కేంద్రాల్లో విజయవంతంగా డ్రైవింగ్‌ పరీక్ష పూర్తిచేసిన అభ్యర్థులకు లైసెన్సు కోసం దరఖాస్తు చేసుకున్న సమయంలో మళ్లీ డ్రైవింగ్‌ టెస్ట్‌ నిర్వహించరు. దీనివల్ల గుర్తింపు (అక్రిడేటెడ్‌) పొందిన కేంద్రాల్లో డ్రైవింగ్‌ నేర్చుకున్నవారికి శిక్షణ పూర్తయిన వెంటనే లైసెన్సు పొందడానికి అవకాశం ఏర్పడుతుంది. ఈ కేంద్రాల్లో పారిశ్రామిక ప్రత్యేక అవసరాలకు తగ్గట్టు ప్రత్యేక డ్రైవింగ్‌ శిక్షణ ఇవ్వడానికి అనుమతి ఇస్తారు.

శిక్షణ సంస్థ గుర్తింపు పొందాలంటే..
* ద్విచక్ర, త్రిచక్ర, తేలికపాటి వాహనాల డ్రైవింగ్‌లో శిక్షణ ఇచ్చేందుకు గుర్తింపు పొందాలంటే కనీసం ఒక ఎకరా స్థలం ఉండాలి.
* ద్వి, త్రిచక్ర, తేలికపాటి, మీడియం, భారీ ప్యాసింజర్‌, సరకు రవాణా వాహనాలు, ట్రెయిలర్స్‌ నడపడంలో శిక్షణ ఇవ్వడానికి కేంద్రం నడపాలంటే కనీసం రెండెకరాల స్థలం ఉండాలి.
* రెండు తరగతి గదులు ఉండాలి. థియరీ తరగతులు, ట్రాఫిక్‌ నిబంధనలు, డ్రైవింగ్‌ ప్రక్రియ, వాహన మెకానిజం, ప్రజాసంబంధాలు, ప్రాథమిక చికిత్స విషయాలపై పాఠాలు చెప్పేందుకు కంప్యూటర్‌, మల్టీమీడియా ప్రొజెక్టర్‌ ఉపయోగించాలి.
* తేలికపాటి, భారీ వాహన శిక్షణ తరగతులకోసం సిమ్యులేటర్స్‌ ఉపయోగించాలి. శిక్షణ కేంద్రానికి బ్రాడ్‌బ్యాండ్‌ కనెక్టివిటీ తప్పనిసరి.
* రివర్స్‌, పార్కింగ్‌, ఎగుడు, దిగుళ్లలో వాహనం నడిపేందుకు అనువైన శిక్షణ ఇచ్చేందుకు అన్నిరకాల డ్రైవింగ్‌ ట్రాక్‌లు ఏర్పాటుచేసుకోవాలి.
* బయోమెట్రిక్‌ అటెండెన్స్‌ వ్యవస్థ, అర్హులైన శిక్షకులు, ఈ-పేమెంట్స్‌ సౌకర్యాలు తప్పనిసరి. టీచింగ్‌ సిబ్బంది తగిన సంఖ్యలో ఉండాలి.
* శిక్షణిచ్చే అన్ని వాహనాలకు బీమా తప్పనిసరి.
* శిక్షణ కేంద్రం నిర్వాహకుడు, అందులో డ్రైవింగ్‌లో శిక్షణ ఇచ్చే శిక్షకులకు కనీసం 12వ తరగతి విద్యార్హత, డ్రైవింగ్‌లో కనీసం అయిదేళ్ల అనుభవం, మోటార్‌ మెకానిక్స్‌లో ప్రొఫిషియన్సీ టెస్ట్‌ సర్టిఫికెట్‌కానీ ఉండాలి.
* డ్రైవింగ్‌ స్కూల్‌కు ఒకసారి అక్రిడిటేషన్‌ మంజూరుచేస్తే అయిదేళ్లపాటు అది అమల్లో ఉంటుంది. గడువు ముగిసేందుకు 60 రోజుల ముందు రెన్యూవల్‌ చేసుకోవాల్సి ఉంటుంది.