అఫ్గాన్‌కు అండగా ఉంటాం

బైడెన్‌ హామీ

వాషింగ్టన్‌: అఫ్గానిస్థాన్‌ నుంచి సైన్యాన్ని ఉపసంహరించిన తరువాత కూడా ఆ దేశానికి అండగా ఉంటామని అమెరికా అధ్యక్షుడు జో బైడెన్‌ హామీ ఇచ్చారు. అఫ్గాన్‌ అధ్యక్షుడు అష్రాఫ్‌ ఘనీ, సీయీవో అబ్దుల్లా అబ్దుల్లాలు శుక్రవారం శ్వేత సౌధంలో బైడెన్‌తో భేటీ అయి వివిధ అంశాలపై చర్చించారు. అనంతరం వారితో కలిసి ఉమ్మడిగా విలేకరుల సమావేశం నిర్వహించారు. రెండు దేశాల భాగస్వామ్యం ముగిసేది కాదని, సుస్థిరంగా కొనసాగుతుందని ఈ సందర్భంగా బైడెన్‌ విస్పష్టంగా ప్రకటించారు. సెప్టెంబరు 11 తరువాత అమెరికా బలగాలు వెనక్కి వచ్చినప్పటికీ, అఫ్గాన్‌కు కావలసినవన్నీ సమకూర్చుతామని చెప్పారు. ‘‘తమకు ఏమి కావాలో అఫ్గాన్లు నిర్ణయించుకోవాలి. మేం సాయం చేయడం లేదు కాబట్టి వారి నిర్ణయాలేవో వారు తీసుకోవాలన్నది దీని సారాంశం కాదు. అర్థంలేని హింస ఆగిపోవాలి. అయితే ఇది చాలా కష్టమే..’’అని వ్యాఖ్యానించారు. తమ రక్షణ కోసం అమెరికా రక్తంతోపాటు ధనాన్ని ధారబోసిందంటూ ఘనీ కృతజ్ఞతలు తెలిపారు.