మరింత సెన్సార్‌షిప్‌ దిశగా డ్రాగన్‌

 ఇంటర్‌నెట్‌ పరిశ్రమ అల్గారిథమ్‌లు ప్రభుత్వ నియంత్రణలోకి

మూడేళ్ల ప్రణాళికను ఆవిష్కరించిన చైనా

బీజింగ్‌: ఇంటర్నెట్‌ సమాచార సేవలకు సంబంధించిన అల్గారిథమ్‌లను ప్రభుత్వ నియంత్రణలోకి తెచ్చేందుకు ఉద్దేశించిన మూడేళ్ల ప్రణాళికను చైనా బుధవారం ఆవిష్కరించింది. ఈ మేరకు ఇంటర్నెట్‌ సమాచార సేవలకు సంబంధించిన అల్గారిథమ్‌ల నిర్వహణను చైనా నియంత్రణ సంస్థలు బలోపేతం చేయనున్నట్లు జిన్హువా వార్తా సంస్థ తెలిపింది. చైనా సైబర్‌ స్పేస్‌ పరిపాలన విభాగం సహా తొమ్మిది విభాగాలు కొత్త మార్గదర్శకాలు జారీచేశాయి. శాస్త్ర సాంకేతిక రంగాల్లో విలువల సమీక్ష వ్యవస్థలు, అల్గారిథమ్‌ భద్రత వ్యవస్థలను ఏర్పాటు చేసుకోవాలని, తమ బాధ్యతలను మరింత సమర్థంగా నిర్వర్తించాలని వాణిజ్య సంస్థలను కోరాయి.