చైనా ఒత్తిళ్లకు తలొగ్గం: తైవాన్‌

తైపీ: తమ గగనతలంలోకి చైనా తరచూ యుద్ధ విమానాలను పంపిస్తూ కవ్వింపులకు తెగబడుతున్న నేపథ్యంలో తైవాన్‌ అధ్యక్షురాలు సై ఇంగ్‌-వెన్‌ కీలక వ్యాఖ్యలు చేశారు. డ్రాగన్‌ సైన్యం నుంచి పొంచి ఉన్న ముప్పును దీటుగా ఎదుర్కొంటామన్నారు. పునరేకీకరణ కోసం ఆ దేశం తీసుకొస్తున్న ఒత్తిళ్లకు తలొగ్గబోమని స్పష్టం చేశారు. నేషనల్‌ డే వేడుకలను పురస్కరించుకొని సై ఆదివారం ప్రసంగించారు. తమ సైనిక సామర్థ్యాలను మరింత పెంచుకోనున్నట్లు చెప్పారు. చైనా తమ ముందుంచిన ఆఫర్లు.. తైవాన్‌ ప్రజల సార్వభౌమత్వానికి భంగం కలిగించేలా ఉన్నాయని పేర్కొన్నారు. తమ సైనిక సామర్థ్యాలను చాటిచెప్పేలా తాజా వేడుకల్లో తైవాన్‌ రక్షణ శాఖ ప్రత్యేక ప్రదర్శనలు నిర్వహించింది.