US: అమెరికా వెళ్లాలంటే కొవిడ్‌ పరీక్షలు తప్పనిసరి

వాషింగ్టన్‌: ప్రయాణానికి ముందు రోజు తప్పనిసరిగా కొవిడ్‌ పరీక్షలు చేయించుకున్న తరవాతనే అమెరికా వెళ్లే విమానాన్ని ఎక్కాల్సి ఉంటుంది. టీకా వేయించుకున్నవారికీ, వేయించుకోని వారికి కూడా ఈ నిబంధన వర్తిస్తుంది. ‘ఒమిక్రాన్‌’ వ్యాపిస్తున్న నేపథ్యంలో అంతర్జాతీయ ప్రయాణికుల విషయంలో బైడెన్‌ ప్రభుత్వం ఈ నిర్ణయం తీసుకొంది. ప్రస్తుతం అమెరికాకు బయలుదేరడానికి మూడు రోజుల ముందు కరోనా పరీక్ష చేయించుకుంటే సరిపోతుందన్న నిబంధన ఉండగా, దాన్ని ఒక రోజుకు పరిమితం చేయనున్నట్టు సెంటర్‌ ఫర్‌ డిసీజ్‌ కంట్రోల్‌ అండ్‌ ప్రివెన్షన్‌ (సీడీసీ) తెలిపింది.