China: చైనాలో 135 ఏళ్లు బతికిన బామ్మ కన్నుమూత

బీజింగ్‌: చైనాలో అతిపెద్ద వయస్కురాలైన అలీమిహాన్‌ సెయితీ కన్నుమూశారు. షిన్‌ జియాంగ్‌ ప్రాంతంలో 135 ఏళ్ల వయసులో ఆమె మరణించినట్లు స్థానిక అధికారులు  శనివారం వెల్లడించారు. మరణించే రోజు వరకు ఎలాంటి అనారోగ్య సమస్యలు లేకుండా సరళమైన జీవితాన్ని గడిపారని తెలిపారు. చైనాలో ‘దీర్ఘాయువుల పట్టణం’గా పేరొందిన కొముజెరిక్‌లో 1886, జూన్‌ 25న సెయితీ జన్మించారు. ఈ పట్టణంలో 90 ఏళ్లు దాటిన వృద్ధులు ఎటుచూసినా కనిపిస్తారు. స్థానిక ప్రభుత్వం ఏటా ఉచిత వైద్య పరీక్షలు, 60 ఏళ్లు దాటిన వృద్ధులకు రాయితీలు అమలు చేస్తోంది. ఎప్పుడూ వేళకు తింటూ.. ఇంటి పెరట్లోని ఎండలో నడుస్తూ సెయితీ ఉల్లాసంగా ఉండేవారని స్థానిక మీడియా పేర్కొంది.