ఖరీదైన చలిమంట.. చలి కాచుకునేందుకు ఓ దొంగ చేశాడంటే!

ముంబయి: ప్రస్తుత శీతాకాలంలో చలి కారణంగా దేశప్రజలు వణికిపోతున్నారు. ఇలాంటి పరిస్థితుల్లో సాధారణంగా కొందరు.. కర్రలకు నిప్పంటించి చలి కాచుకుంటారు. మహారాష్ట్రకు చెందిన ఓ దొంగ మాత్రం.. చలికాచుకునేందుకు చోరీ చేసిన ద్విచక్ర వాహనానికే నిప్పంటించాడు. నాగ్‌పుర్‌లోని యశోధరానగర్‌లో తమ వాహనాలు చోరీకి గురయ్యాయంటూ అనేక మంది ఫిర్యాదు చేశారు. ఈ క్రమంలోనే చోటా సర్ఫరాజ్‌తో పాటు అతని నలుగురు అనుచరులను పోలీసులు అరెస్ట్‌ చేశారు. ఆ ముఠా 10 ద్విచక్ర వాహనాలను దొంగతనం చేసినట్లు తేలింది. వాటిలో.. 9 వాహనాలను పోలీసులు స్వాధీనం చేసుకున్నారు. పదో వాహనం గురించి సర్ఫరాజ్‌ను ప్రశ్నించగా.. ‘‘బాగా చల్లగా ఉంటోంది. అందుకే చలి కాచుకునేందుకు ఆ ద్విచక్ర వాహనానికి నిప్పుపెట్టాను’’ అని తెలిపాడు. దీంతో ఆశ్చర్యపోవడం పోలీసుల వంతైంది.