Piyush Jain: రూ.52 కోట్లు పన్నుగా తీసుకోండి..వ్యాపారి పీయూష్‌ జైన్‌ ప్రతిపాదన

దిల్లీ: భారీ స్థాయిలో పన్ను ఎగవేసి, రూ.కోట్లకొద్దీ నగదును ఇంట్లో దాచి దొరికిపోయిన ఉత్తర్‌ప్రదేశ్‌ కాన్పుర్‌కు చెందిన సుగంధ ద్రవ్యాల వ్యాపారి పీయూష్‌ జైన్‌ కొత్త వాదనను తెరపైకి తీసుకొచ్చాడు. తాను పన్ను ఎగ్గొట్టిన మాట వాస్తవమేనని, అయితే తన నుంచి అధికారులు స్వాధీనం చేసుకున్న రూ.195 కోట్లలో అపరాధ రుసుముగా రూ.52 కోట్లను మినహాయించి మిగిలినది వెనక్కు ఇవ్వాలని ప్రతిపాదన పెట్టాడు. ఈమేరకు ఆయన తరఫు న్యాయవాది కోర్టులో వాదనలు వినిపించారు.  

* పీయూష్‌ నుంచి స్వాధీనం చేసుకున్న సొమ్మును వ్యాపారం ద్వారా ఆర్జించిన ఆదాయంగా డైరెక్టరేట్‌ జనరల్‌ ఆఫ్‌ జీఎస్టీ ఇంటెలిజన్స్‌ పరిగణిస్తోందని, అందులో నాలుగో వంతును పన్ను కింద మినహాయించి మిగిలినది తిరిగివ్వనున్నట్లు జరుగుతున్న ప్రచారాన్ని ఆ సంస్థ ఖండించింది. ప్రస్తుతం ఈ వ్యవహారంలో దర్యాప్తు జరుగుతోందని, అది పూర్తయ్యాకే చెల్లించాల్సిన పన్ను ఎంత అనేది నిర్ధారణ అవుతుందని పేర్కొంది.