సినీఫక్కీలో మాజీ మంత్రిని వెంటాడి పట్టుకున్నారు

హాసన, న్యూస్‌టుడే: తమిళనాడు మాజీ మంత్రి రాజేంద్ర బాలాజీని పోలీసులు సినీ ఫక్కీలో కర్ణాటకలో అరెస్టు చేశారు. ఉద్యోగాలిప్పిస్తానంటూ అనేకమంది నిరుద్యోగుల నుంచి కోట్లాది రూపాయలను తీసుకుని మోసగించారనేది రాజేంద్ర బాలాజీపై ఉన్న అభియోగం. ఈ నేపథ్యంలో ఆయన కొన్నాళ్లుగా తప్పించుకు తిరుగుతున్నారు. కర్ణాటకలోని హాసన పట్టణంలో రాజేంద్ర తలదాచుకున్నట్లు నిర్ధారించుకున్న తమిళనాడు పోలీసులు స్థానిక పోలీసుల సాయంతో అరెస్టు చేసేందుకు సిద్ధమయ్యారు. సమాచారశాఖ కార్యాలయం ఎదురుగా బుధవారం ఉదయం కారులో వెళ్తున్న విషయాన్ని గుర్తించి ఆ వాహనాన్ని వెంటాడారు. సిగ్నల్‌వద్ద కారు ఆగడంతో రాజేంద్రను అదుపులోకి తీసుకున్నారు.