Dera Baba: డేరా బాబాకు 3,500 మందితో భద్రతా?..

ఆయన ఏమైనా ప్రధానా?

 పంజాబ్‌-హరియాణా హైకోర్టు వ్యాఖ్య

గురుగ్రంథ్‌ సాహిబ్‌ అపవిత్రమైన ఘటన కేసులో నిందితుడు రామ్‌ రహీమ్‌ అలియాస్‌ డేరా బాబాను పంజాబ్‌ తరలించే విషయంపై పంజాబ్‌-హరియాణా హైకోర్టు కీలక వ్యాఖ్యలు చేసింది. భారీ బందోబస్తుతో పంజాబ్‌ తీసుకెళ్లేందుకు అతను వీఐపీనో లేక ప్రధానో కాదని వ్యాఖ్యానించింది. హరియాణా రోహ్‌తక్‌లోని సునారియా జైలులో ఉన్న రామ్‌ రహీమ్‌ను 3,500 మంది పోలీసుల భద్రత మధ్య హెలికాప్టర్‌లో పంజాబ్‌కు తరలిస్తామన్న ఆ రాష్ట్ర అడ్వకేట్‌ జనరల్‌ డీఎస్‌ పాట్‌వాలియా వ్యాఖ్యలపై హైకోర్టు ఈ విధంగా స్పందించింది. విచారణ జరపాల్సి వస్తే జైల్లోనే అతణ్ని కలుసుకోవాలని సూచించింది. ప్రధాని నరేంద్ర మోదీ పంజాబ్‌ పర్యటనలో జరిగిన భద్రతా వైఫల్యాన్ని ఈ సందర్భంగా ప్రస్తావించింది. తదుపరి విచారణను ఏప్రిల్‌కు వాయిదా వేసింది. 

 - ఈటీవీ భారత్‌