TrainTickets: రైలు టికెట్లపై అభివృద్ధి పన్ను భారం

దిల్లీ: దూర ప్రయాణాలు చేసే రైలు ప్రయాణికులపై అభివృద్ధి పన్ను భారం పడనుంది. రైల్వేశాఖ పునరుద్ధరిస్తున్న రైల్వేస్టేషన్లకు ఈ పెంపు వర్తిస్తుంది. స్టేషన్‌ అభివృద్ధి రుసుం (స్టేషన్‌ డెవలప్‌మెంట్‌ ఫీ /ఎస్డీఎఫ్‌) పేరిట ప్రయాణికుల నుంచి టికెట్‌ స్థాయినిబట్టి రూ.10 నుంచి రూ.50 దాకా అదనంగా వసూలు చేయనున్నారు. రైల్వే టికెట్ల బుకింగు సమయంలోనే ఈ అదనపు మొత్తాన్ని కలుపుతారు. ఆయా స్టేషన్ల నవీకరణ పూర్తయ్యాకే ఈ వడ్డింపు ఉంటుందని అధికారవర్గాలు తెలిపాయి. ఈ అదనపు రుసుం మూడు కేటగిరీలుగా ఉంటుంది. ఏసీ క్లాస్‌ ప్రయాణికులకు రూ.50, స్లీపర్‌ క్లాసుకు రూ.25, అన్‌ రిజర్వుడు క్లాసుకు రూ.10 వసూలు చేస్తారు. సబర్బన్‌ రైలు ప్రయాణాలకు ఈ అదనపు ఛార్జీల నుంచి మినహాయింపు ఉంటుంది. ఈ మేరకు రైల్వేబోర్డు ఓ అధికారిక ప్రకటన విడుదల చేసింది.