కేంద్ర నిర్ణయం దిగ్భ్రాంతికరం

పశ్చిమబెంగాల్‌ శకటాన్ని తిరస్కరించడంపై సీఎం మమత
పునరాలోచించాలంటూ ప్రధాని మోదీకి లేఖ

కోల్‌కతా: దేశ రాజధాని దిల్లీలో జరగనున్న గణతంత్ర వేడుకల్లో పశ్చిమబెంగాల్‌ సర్కారు ప్రతిపాదించిన శకటాన్ని తిరస్కరిస్తూ కేంద్ర ప్రభుత్వం నిర్ణయం తీసుకోవడం దిగ్భ్రాంతి కలిగించిందని రాష్ట్ర ముఖ్యమంత్రి మమతా బెనర్జీ పేర్కొన్నారు. ఈ చర్యతో రాష్ట్ర ప్రజలు సైతం ఆవేదనకు గురయ్యారని.. తక్షణం ఈ నిర్ణయాన్ని ఉపసంహరించుకోవాలని డిమాండ్‌చేశారు. ఈ మేరకు ఆదివారం ప్రధాని మోదీకి మమత లేఖ రాశారు. ఎలాంటి కారణం చూపకుండానే రాష్ట్ర శకటాన్ని తిరస్కరించడం సరైంది కాదన్నారు. నేతాచ్కీజీజి సుభాష్‌ చంద్రబోస్‌ 125వ జయంతి సందర్భంగా ఆయనను, ఆయన నేతృత్వంలోని ఇండియన్‌ నేషనల్‌ ఆర్మీని గుర్తు చేసుకునేలా ఈ శకటాన్ని రూపొందించామని మమత ఈ సందర్భంగా పేర్కొన్నారు. శకటాన్ని తిరస్కరిస్తూ కేంద్రం తీసుకున్న నిర్ణయంతో రాష్ట్ర ప్రజలు తీవ్ర ఆవేదనకు గురయ్యారన్న విషయాన్ని మీ దృష్టి తీసుకొస్తున్నట్లు ప్రధానికి రాసిన లేఖలో మమత పేర్కొన్నారు. తక్షణం ఈ నిర్ణయాన్ని ఉపసంహరించుకోవాలని.. 75వ స్వాతంత్య్ర వేడుకల సందర్భంగా బెంగాల్‌ శకటానికి అవకాశం కల్పించాలని విజ్ఞప్తిచేశారు.