కుష్టు వ్యాధి పీడితులపై వివక్షను రూపుమాపాలి

కేంద్ర, రాష్ట్రాలకు జాతీయ మానవహక్కుల కమిషన్‌ సూచన

దిల్లీ: కుష్టువ్యాధి పీడిత వ్యక్తులపై వివక్షను చూపే చట్టాలను తొలగించాలని కేంద్ర, రాష్ట్రాలకు జాతీయ మానవ హక్కుల సంఘం(ఎన్‌హెచ్‌ఆర్‌సీ) లేఖ రాసింది. ఇందుకు సంబంధించి 97 చట్టాల జాబితాను రూపొందించింది. కుష్టురోగులపై వివక్ష చూపే అవమానకరమైన నిబంధనలు ఈ చట్టాల్లో ఉన్నాయని పేర్కొంది. వీటిని తొలగించేందుకు కేంద్రం ప్రత్యేక చట్టం తేవాలని విశ్రాంత న్యాయమూర్తి అరుణ్‌కుమార్‌ మిశ్ర నేతృత్వంలోని ఎన్‌హెచ్‌ఆర్‌సీ సిఫార్సు చేసింది. ఈ మేరకు ఓ ప్రకటన విడుదల చేసింది. కుష్టు వ్యాధితో బాధపడుతున్న వారిని సకాలంలో గుర్తించి, చికిత్స చేయాలని పిలుపునిచ్చింది. ఇందుకోసం భారీగా ప్రచారం చేయాలని కోరింది. ఆరోగ్య సంరక్షణ, ఉపాధి, విద్య, భూమి హక్కులు లేదా ఏ ఇతర హక్కు విషయంలోనూ కుష్టువ్యాధి పీడిత వ్యక్తి లేదా అతని కుటుంబసభ్యులు వివక్షకు గురికాకుండా చూడాలని సూచించింది.