టీకా ప్రభావాలపై గర్భిణులకు అవగాహన కల్పించాం

సర్వోన్నత న్యాయస్థానంలో కేంద్రం ప్రమాణపత్రం

దిల్లీ: కొవిడ్‌ టీకా తీసుకోవడం వల్ల కలిగే ప్రయోజనాలు, తలెత్తే అవకాశమున్న దుష్పరిణామాల గురించి గర్భిణులు, పాలిచ్చే తల్లులకు అవగాహన కల్పించామని సుప్రీం కోర్టుకు కేంద్ర ప్రభుత్వం నివేదించింది. ఈ విషయంలో గత ఏడాది జులై 2న ప్రామాణిక నిర్వహణ విధానాలు (ఎస్‌వోపీ), మార్గదర్శకాలు జారీ చేశామని తెలిపింది. సర్వోన్నత న్యాయస్థానంలో మంగళవారం ఈ మేరకు ప్రమాణపత్రం (అఫిడవిట్‌) సమర్పించింది. గర్భధారణ సమయంలో కొవిడ్‌ మహమ్మారి బారిన పడితే ఎలాంటి సమస్యలు ఎదురయ్యే అవకాశముందో కూడా మహిళలకు తెలియజేస్తున్నట్లు పేర్కొంది.