ఫూటుగా తాగాడు.. బిల్లు అడిగితే బొటన వేలు కొరికేశాడు..

ముజఫర్‌నగర్‌: బార్‌కు వెళ్లి ఫూటుగా తాగిన ఓ వ్యక్తి.. బిల్లు చెల్లింపు విషయంలో తలెత్తిన గొడవలో ఏకంగా బార్‌ యజమాని బొటన వేలినే కొరికేశాడు. ఈ ఘటన ఉత్తర్‌ప్రదేశ్‌లోని ముజఫర్‌నగర్‌ జిల్లాలో మంగళవారం చోటుచేసుకుంది. పోలీసులు తెలిపిన వివరాల ప్రకారం.. జనసత్‌ పట్టణంలోని బార్‌లో సునీల్‌కుమార్‌ అనే వ్యక్తి అతని స్నేహితుడితో కలిసి మద్యం తాగాడు. బిల్లు చెల్లించాల్సిందిగా బార్‌ యజమాని అశోక్‌కుమార్‌ కోరడంతో వారి మధ్య వాగ్వాదం చోటుచేసుకుంది. ఈ క్రమంలో ఆగ్రహానికి గురైన సునీల్‌ అశోక్‌కుమార్‌ బొటన వేలిని కొరికాడు. ఈ ఘటనలో సునీల్‌తో పాటు అతని స్నేహితుడిని పోలీసులు అదుపులోకి తీసుకున్నారు.