ఆరడుగుల కొండచిలువను మింగేసిన కింగ్‌ కోబ్రా

కటక్‌, న్యూస్‌టుడే: ఆరడుగుల కొండచిలువను మింగేసి కదల్లేని స్థితిలో ఉన్న 11 అడుగుల కింగ్‌ కోబ్రాను స్నేక్‌ హెల్ప్‌లైన్‌ సభ్యులు పట్టుకున్నారు. ఒడిశాలోని అనుగుల్‌ జిల్లా సతకోసియా అభయారణ్యానికి సమీపంలోని కరడపడ గ్రామంలో దశ బెహరా అనే వ్యక్తి ఇంట్లో మంగళవారం కింగ్‌కోబ్రా కంటపడింది. స్నేక్‌ హెల్ప్‌లైన్‌ ప్రతినిధులకు సమాచారం అందించగా, ఇంటి వద్దకు చేరుకొని కింగ్‌కోబ్రాను పట్టుకున్నారు. ఏదో పొడవైనది మింగడంతో కదల్లేకపోతోందని భావించి, పాము పొట్టలో ఉన్నది కక్కేలా చేశారు. దాంతో దాని నోటి నుంచి మృతి చెందిన 6 అడుగుల కొండచిలువ బయటపడింది. అనంతరం కింగ్‌కోబ్రాను సమీపంలోని అడవిలో విడిచి పెట్టారు.