ఇంటి మిద్దెపై ద్రాక్ష తోట..

ఇంటి మిద్దెపై కూరగాయలు, పూల మొక్కలు పెంచటం చూశాం. కానీ ఓ రైతు ఏకంగా ద్రాక్ష తోటనే పెంచి ఎందరికో ఆదర్శంగా నిలిచారు. ఈ రకంగా మిద్దె సాగును మరో అంచెకు తీసుకెళ్లారు. ఆయనే మహారాష్ట్రలోని పుణెకు చెందిన బాహుసాహెబ్‌ కాంచన్‌. కింద ఉన్న మట్టిలో ద్రాక్ష మొక్కలను నాటి.. వాటి తీగలను రెండో అంతస్తు పైకి పాకేలా చేశారు. మిద్దెపైన కర్రలు, ఐరన్‌ రాడ్‌లతో ఊతమిచ్చి ద్రాక్ష తోటను పెంచారు. పక్షులు, ఇతర జంతువుల బెడద లేకుండా చుట్టూ తెరలు అమర్చారు. 2013లో ఐరోపా పర్యటనకు వెళ్లినప్పుడు అక్కడి ప్రాంతాల్లో మిద్దెలపై ద్రాక్ష, ఇతర పండ్ల తోటలను పెంచటం చూసి స్ఫూర్తి పొందానని బాహుసాహెబ్‌ పేర్కొన్నారు.