కొలిక్కిరాని ‘హిజాబ్‌’ సమస్య

కర్ణాటకలో కొనసాగుతున్న వివాదం

ఉడుపి, న్యూస్‌టుడే: హిజాబ్‌ (తల, మెడ చుట్టూ ధరించే బురఖా లాంటి వస్త్రం) సమస్యకు పరిష్కారం కనుగొనకుండానే బుధవారం కర్ణాటకలోని ఉడుపి పట్టణంలో నిర్వహించిన అధికారుల సమావేశం ముగిసింది. ఈనెల ఒకటి నుంచి కొనసాగుతున్న ఈ సమస్యకు పరిష్కారం లభిస్తుందనుకున్న విద్యార్థినులకు నిరాశే మిగిలింది. ఉడుపి పట్టణంలోని ప్రభుత్వ జూనియర్‌ కళాశాలకు చెందిన ఆరుగురు ముస్లిం విద్యార్థినులు హిజాబ్‌లను ధరించి రావడాన్ని వ్యతిరేకిస్తూ అధ్యాపకులు వారిని తరగతుల్లోకి అనుమతించలేదు. ఫలితంగా తరగతుల వెలుపలే వీరంతా గడపాల్సి వస్తోంది. సమస్యను పరిష్కరించేందుకు బుధవారం విద్యార్థులు, తల్లిదండ్రులు, విద్యాశాఖ అధికారులు, కళాశాల యాజమాన్య ప్రతినిధులు సమావేశమైనా ఏకాభిప్రాయానికి రాలేకపోయారు. హిజాబ్‌ను ధరించి కళాశాలకు వచ్చేందుకు అనుమతించేదిలేదని, కావాలనుకుంటే ఆ విద్యార్థినులకు టీసీ ఇస్తామని కళాశాల కమిటీ అధ్యక్షుడు, స్థానిక శాసనసభ్యుడు రఘుపతి భట్‌ స్పష్టం చేశారు. ఇటీవలే చిక్కమగళూరు జిల్లాలోని కొప్ప కళాశాలలో ఇదే తరహా వివాదం చోటుచేసుకుంది. ముస్లిం విద్యార్థినులు హిజాబ్‌ ధరించి కళాశాలకు వచ్చినందుకు కొందరు విద్యార్థులు కాషాయ శాలువాలతో తరగతులకు హాజరయ్యారు. తరువాత ఇరు వర్గాలకు నచ్చజెప్పడంతో వాటిని ధరించకుండా వచ్చేందుకు విద్యార్థులు అంగీకరించడంతో కొప్పలో వివాదం సద్దుమణిగింది.