దుస్తుల అద్దకం పరిశ్రమలో అగ్నిప్రమాదం..

ముగ్గురు కార్మికుల సజీవదహనం

బార్దోలి: గుజరాత్‌లోని సూరత్‌ జిల్లా బార్దోలి పట్టణానికి సమీపంలోని దుస్తుల అద్దకం పరిశ్రమలో గురువారం తెల్లవారుజామున జరిగిన అగ్నిప్రమాదం ముగ్గురి ప్రాణాలు బలి తీసుకొంది. మూడంతస్తుల భవనం నుంచి 10 మంది కార్మికులను కాపాడారు. వడ్రంగి పని కోసం మిల్లు యజమాని తీసుకువచ్చిన ముగ్గురు కార్మికుల కాలిన మృతదేహాలను మొదటి అంతస్తులో గుర్తించినట్లు బార్దోలి చీఫ్‌ ఫైర్‌ ఆఫీసర్‌ పి.బి.గాధ్వి తెలిపారు. పని ముగించుకొని అక్కడే పడుకొన్న ఈ ముగ్గురూ గాఢనిద్రలో ఉండి, చుట్టూ చెలరేగిన మంటల నుంచి తప్పించుకోలేకపోయారు. వందమంది అగ్నిమాపక సిబ్బంది పదిహేను యంత్రాలతో 12 గంటలు శ్రమించాక మంటలు అదుపులోకి వచ్చాయి. భవనం మొత్తం కాలిపోయింది. నిండా మండే రసాయనాలు, దుస్తుల రంగులు, దారపు ఉండలు ఉండటంతో మంటలు వేగంగా వ్యాపించాయి. పెద్దమొత్తంలో రెడీమేడ్‌ దుస్తులు దగ్ధమైనట్లు గాధ్వి తెలిపారు. షార్ట్‌ సర్క్యూటుకు సిలిండర్లు పేలి, అగ్నిప్రమాదం జరిగి ఉంటుందని స్థానికులు తెలిపారు.