అధికారులపై చేయి చేసుకున్న కేంద్ర మంత్రి!

భువనేశ్వర్‌, న్యూస్‌టుడే: కేంద్ర గిరిజన సంక్షేమ, జలశక్తి శాఖల సహాయ మంత్రి బిశ్వేశ్వరటుడు శుక్రవారం ఇద్దరు అధికారులపై చేయి చేసుకున్నారు. ఒడిశాలోని మయూరభంజ్‌ జిల్లా ప్రణాళికా వ్యవహారాలు పర్యవేక్షిస్తున్న అధికారులు అశ్విని మల్లిక్‌, దేవాశిష్‌ మహాపాత్ర్‌లను కుర్చీతో కొట్టారు. బాధిత అధికారులు విలేకరులతో మాట్లాడుతూ.. సమీక్షా సమావేశానికి తన నివాసానికి రావాలని పిలిచిన టుడు దుర్భాషలాడి.. కుర్చీతో కొట్టినట్లు వెల్లడించారు. ఈ ఘటనను మయూర్‌భంజ్‌ జిల్లా అదనపు కలెక్టరు రుద్రనారాయణ మహంతి తప్పు పట్టారు, అధికారులపై చేయి చేసుకోవడం తగదన్నారు. మంత్రి టుడు ఒక టీవీ ఛానెల్‌తో మాట్లాడుతూ అదంతా అవాస్తవమని కొట్టిపారేశారు.