Covid Vaccine: చనిపోయిన మహిళకు రెండో డోసు టీకా!

మూడు నెలల కిందట చనిపోయిన హేమలత అనే మహిళకు.. తాజాగా కరోనా టీకా రెండోడోసు ఇచ్చినట్లు బంధువుల మొబైల్‌ నంబరుకు సందేశం వచ్చింది. వైరల్‌గా మారిన ఈ ఘటన ఉత్తర్‌ప్రదేశ్‌లోని మహోబాలో జరిగింది. దీనిపై జిల్లా ప్రధాన వైద్యాధికారి డా.సుధాకర్‌ పాండే ఓ కమిటీని ఏర్పాటు చేస్తూ విచారణకు ఆదేశించారు. వైద్యఆరోగ్య శాఖ జారీ చేసిన మరణ ధ్రువీకరణ పత్రం ప్రకారం.. హేమలత గత సెప్టెంబరు 21న కొవిడ్‌ కారణంగానే మరణించారు. ఇప్పుడు ఆమె కరోనా వ్యాక్సిను రెండోడోసు తీసుకున్నట్లు మృతురాలి మేనల్లుడు సౌరవ్‌ యాదవ్‌ సెల్‌ఫోనుకు సందేశం వచ్చింది. ఈ మెసేజ్‌ రాకమునుపు సౌరవ్‌కు టీకా పంపిణీకి సంబంధించి జనవరి 15న వెరిఫికేషన్‌ కాల్‌ కూడా వచ్చింది. ఆ సమయంలో అతను మేనత్త చనిపోయినట్లు సమాచారం కూడా ఇచ్చాడు. అయినా.. టీకా తీసుకున్నట్లు మెసేజి రావడం చూసి అందరూ అవాక్కవుతున్నారు.