క్షమాపణలు చెప్పిన శ్వేతా తివారి

భోపాల్‌/ముంబయి : ప్రముఖ బుల్లితెర నటి శ్వేతా తివారి దేవుడిపై చేసిన వ్యాఖ్య వివాదాస్పదం కావడంతో.. గురువారం క్షమాపణలు చెప్పారు. బుధవారం ఆమె భోపాల్‌లో విలేకరులతో మాట్లాడుతూ.. తన లో దుస్తులకు, దేవుడికి లంకె పెడుతూ ఓ వ్యాఖ్య చేశారు. ఆమె మాటలు హిందూ దేవుళ్లను కించపరిచేలా ఉన్నాయంటూ పెద్దఎత్తున విమర్శలు వచ్చాయి. ఈ నేపథ్యంలో ఆమె క్షమాపణలు చెప్పారు. తన సహ నటుడు గతంలో దేవుడి పాత్ర పోషించారని, అతన్ని ఉద్దేశించి చేసిన ఆ వ్యాఖ్యను తప్పుగా అర్థం చేసుకున్నారన్నారు. మరోవైపు మధ్యప్రదేశ్‌ హోం మంత్రి నరోత్తమ్‌ మిశ్రా ఆదేశాలతో శ్వేతాపై భోపాల్‌లో కేసు నమోదైంది.